Job 1

Thumapi

1 Uz gamah Job min nei mi khat a teng hi. Hih mipa thutangin a pau baang kei hi; amah in Pasian kihta a gamtat hoih lo a pel hi. 2 Amah in ta pasal sagih le ta numei thum nei a, 3 tuu tul sagih, kala-oh tul thum, bawngtal kap zanga le laa zanga, le nasem tampitak a nei hi. Nisuahna gam mite khempeuh lakah a lian pen ahi hi.

4 A tapate in amau inn ah a banbanin pawi bawl zel uh a, a nek a dawn khawmpih dingun a sanggam numei thumte a sam uh hi. 5 Pawi bawl vial khat a kikhit ciangin Job in amaute samin a siansuah hi. Zingsang tungin amaute khat ciat adingin meihal biakna piaksak a, “Ka tate in mawhna bawla a lungsim uah Pasian a samsiat khak uh leh,” cih a ngaihsutna ahi hi. Hih pen Job in a hunhunin ngeina-a a neih ahi hi. ^a

Job Kizia-etna Masapen

6 Ni khat TOPA mai-ah vansawltakte ^{▼▼1.6 Hebrew ah Pasian’ tapate} va om uh a, amaute tawh Satan ^{▼▼1.6 Satan pen mawh puapa cihna} zong a paikhawm hi. 7 TOPA in Satan kiangah, “Koi pana hong pai na hi hiam?” a ci hi. ^d

Satan in TOPA kiangah, “Leitung mun khempeuh ah vakin ka vaksuk ka vaktohna pan hi,” ci-in a dawng hi. ^e

8 Tua ciangin TOPA in Satan kiangah, “Ka nasempa Job na ngaihsun kha ngei hiam? Leitungah amah tawh kibang kuamah a om kei hi; amah thutangin paubaang lo a, Pasian a kihta gamtatsia a pel mi khat ahi hi,” a ci hi. ^f

9 Satan in, “Job in a mawkna-in Pasian kihta ahi hiam?” ci-in dawng a, 10 “Amah le a innkuanpihte le a neihsa khempeuh kimkotah dai kai zo hi lo na hi hiam? A khuta a septe thupha na pia a, a tuuhonte le a bawnghonte mun tengah kizel hi. 11 Ahi hangin na khut zanin a neihsa khempeuh suksak lecin na maitangah hong hamsiat taktak ding hi,” ci-in a dawng hi.

12 TOPA in Satan kiangah, “Tua ahileh pha hi, ama neihsa khempeuh nang thu hihen; ahi hangin mipa tungah na khutme zong na nga kei ding hi,” a ci hi. ^g

Tua ciangin TOPA’ omna pan Satan a pai khia hi.

13 Ni khat Job tanute le tapate a sanggam upenpa uh inn ah pawi bawlin zu a dawn laitakun, 14 Job kiangah kamtai khat tunga, “Lo kho kimlai bawngtalte le a kianga gamta laate 15 Sabe mite in hong simin tuate hawlmang khin uh hi. Amaute in nasemte namsau-in that uh a, nang hong ko dinga suakta kei kia bek ka hi hi!” a ci hi. ^h

16 A gengen laitakin kamtai dang khat tunga, “Vantung pan Pasian meikuang hong kiasukin tuute le nasemte kangtum a, nang hong ko dinga suakta kei kia bek ka hi hi!” a ci hi. ⁱ

17 A gengen laitakin kamtai dang khat mah tung lai a, “Chaldea mite pawlthum in hong sim uh a kala-ohte manin a paipihmang uh hi. Amaute in nasemte namsau-in ban uh a, nang hong ko dinga suakta kei kia bek ka hi hi!” a ci hi. ^j

18 A genkhin nai loin kamtai dang khat mah hong tung lailai a, “Na tanute le na tapate in pawi bawl uh a, na tapa upa pen inn ah zu a dawn laitakun 19 sehnel-gam lam pan huih khauh khat nungvatin, inn pumpi mutpai hi. Inn in puknelha, amaute si khin uh hi; nang hong ko dinga suakta kei kia bek ka hi hi!” a ci hi.

20 Tua takteh, Job ding to-a a puantualpi balkekin a lu a mettol hi. Tua ciangin leitual ah boksukin bia a, ^k

21 “Ka nu sung pan guaktangin ka suaka,
guaktang mah in ka ciah ^{▼▼1.21 Ahikeh tua lai-in ciahkik ding} kik ding hi.
TOPA in hong pia a, TOPA mah in lakhia khin hi; ^m
TOPA min kiphat hen,” a ci hi. ⁿ

22 Hihte khempeuh ah Pasian mawh sakna tawh Job a mawh kei hi. ^o